Tối tơbleăng a rôh hôp ăm hlo, 4 khế apoăng hơnăm 2026, cheăng kâ kân hlo tơniăn, pro mơhrê liăn ngân châ mơdât, mâu tơdroăng pêi pro tơdâng tơ’mô kân châ rak tơniăn; nâp liăn tiô riân châ 1,11 rơtuh rơtal liăn, kơxô̆ liăn châ xo ing tê tơmeăm ngi kong têa ê lối 344 rơtal USD.

Tơpui a rôh hôp, pôa Lê Minh Hưng, Ngế pro xiâm hnê ngăn tơnêi têa pơkâ thế thăm mơnhông ‘na pơxâu hôu, kơtăng tung mơjiâng ƀă pơkâ ăm hlá mơ-éa luât; tơdrêng amê, hlối tơbleăng tơdâng tơ’mô mâu troăng hơlâ thăm mơnhông tro ƀă rak vế tơniăn cheăng kâ kân. Khu xiâm ngăn châ pơcháu séa ngăn troăng hơlâ tŏng gum, mơdât tơdroăng ki ôh tá nâp hnoăng liăn mơhá, mơdek rĕng tơdroăng ki veăng tơlo liăn; mâu grup, kŏng ti tơkŭm pro klêi mâu tơdroăng pơkâ pêi mơjiâng pro tê mơdró ƀă thăm mơdêk pro tơdroăng tơkêa ki kal.

Khu xiâm ngăn ‘na Chiâk deăng ƀă Hyôh kong prâi châ pơkâ thế rĕng pơkâ tơdroăng pơkâ pêi xoăng liăn ăm tơdroăng tơnêi têa pơkâ pêi, kơjo gum ăm têa krúa ƀă ‘mâi xĕn kuăn pơlê lo ing kơpong ki tơnêi tơhnah tơhnâp; Khu xiâm ngăn kơmăi kơmok ƀă tê mơdró chêh pro klêi Túa pơkâ pro on tơhrik VIII, vâ tơniăn ai on tơhrik xúa.