Pêi hnoăng cheăng trâm mâ kuăn pơlê klêi kơ’nâi hneăng hôp má môi, Kuô̆k hô̆i hneăng má XVI, mê a kơxo lơ 4/5, pôa Trần Thanh Mẫn, Kăn xiâm hnê ngăn Kuô̆k hô̆i rơtế ƀă Khu râ kăn teăng mâ Kuô̆k hô̆i Pơlê kong kân Hồ Chí Minh (tíu tâ phĭu kơxô̆ 12). Roh trâm mâ châ pêi pro tơdrêng a cheăm Hóc Môn ƀă mơ’no tơdrêng tung um tiô troăng hyôh măng a 10 tíu mơ’no hyôh  mâu cheăm tung Pơlê kong kân Hồ Chí Minh.

A roh trâm mâ, teăng mâ Khu râ kăn Kuô̆k hô̆i, pôa Trần Thanh Mẫn, Kăn xiâm hnê ngăn Kuô̆k hô̆i hiăng tiâ 16 rơkong kơ-êng dêi kuăn pơlê ƀă 6 khu tơdroăng. Tơdjâk troh tơnêi tơníu, pơkâ pêi, hngêi ối, kơvâ ki kuăn pơlê tơmâng hên má môi, pôa Trần Thanh Mẫn tối ăm ‘nâi, Kuô̆k hô̆i hiăng tơbleăng Tơdroăng pơkâ 254 pơkâ ‘na mâu troăng hơlâ ki nhên vâ tah lôi pá puât, tơvâ tơvâ tung pêi pro Luât ‘na Tơnêi tơníu.

Kăn xiâm hnê ngăn Kuô̆k hô̆i tối ăm ‘nâi, Khu xiâm kal kí hiăng môi tuăn pêi pro tiô troăng hơlâ mơjiâng Luât pơlê kân ki krê ăm pơlê kong kân. Tâng châ Kuô̆k hô̆i tơbleăng ăm pêi pro, mâu troăng pơkâ pêi, troăng hơlâ tung luât kô gum tah lôi mâu pá puât, tơvâ tơvân, pro tơ’lêi hlâu ăm pơlê kong kơdrâm mơnhông tung mâu kơvâ cheăng kâ – rêh ối pơlê pơla, tơniăn gâk kring tơnêi têa – gâk kring pơlê pơla ƀă mơjiâng khu râ kăn cheăng kal kí.