Tơbleăng a rôh hôp ăm ‘nâi, cheăng kâ pơtối hlo hên tơniăn. Kơxô̆ liăn châ xo ing tê tơmeăm ngi kong têa ê rôh apoăng châ lối 1.000 rơtal USD. Kơxô̆ liăn ‘no tơdrêng dêi kong têa ê chêh inâi pêi cheăng châ dâng 55 rơtal USD, nâp liăn tơnêi têa châ 2,44 rơtuh rơtal liăn. Ki rơhêng vâ tối, lối 900 tơdroăng tơkêa ki tá hâi pro klêi hiăng pơxiâm châ xúa. Mơgêi rôh hôp, pôa Lê Minh Hưng, Ngế pro xiâm hnê ngăn tơnêi têa tối nhên, hbrâ mơdât pro mơhrê, rak vế tơniăn cheăng kâ kân cho hnoăng cheăng ki châ kơjo má môi tung péa khế mơ’nui hơnăm, pro ivá ăm thăm mơnhông krá tơniăn ƀă rak vế tŏng gum rêh ối pơlê pơla.

Ngế pro xiâm hnê ngăn tơnêi têa pơkâ thế mâu khu xiâm kơvâ cheăng kong pơlê kơtăng ‘no tâi tâng liăn tiô pơkâ kơxô̆ liăn pêi cheăng tơnêi têa, tíu pêi cheăng tơnêi têa ƀă tơnêi pêi cheăng tơnêi têa. Tơdrêng amê hlối mơdêk tê tơmeăm ngi kong têa ê, mơhnhôk mâu ngế ki roê xúa tung tơnêi têa, tơdjêp tíu tê ƀă roê hlối mơdêk tê mơdró, veăng gum pêi pro tiô pơkâ pêi thăm mơnhông cheăng kâ plâ hơnăm.