Việt Nam hiăng péa xôh tơkŭm po ƀlêi chiâng Hơnăm APEC a mâu hơnăm 2006 ƀă 2017. Hơnăm APEC 2027 cho môi tung mâu tơdroăng cheăng tơpui kâ ki kal xiâm dêi Việt Nam sap ing nôkố troh hơnăm 2030, pâ thế hbrâ rơnáu tŭm têk, rơkê, tơ’mô a kơlo ki kân má môi. Tá troh nôkố, hên hnoăng cheăng hiăng pêi pro klêi tiô tơdroăng mơ’no.

Tối nhên tơdroăng tơkŭm po ƀlêi chiâng Hơnăm APEC 2027, malối cho Măng tĭng po hôp Khu râ kăn xiâm, kô ‘măn chôu tơdroăng ki ôh tá kâi púi dêi Việt Nam tung APEC ƀă mâu vâi pú tung lâp plâi tơnêi, tơdrêng amê hlối cho rôh tơdjêp mâu kơxô̆ liăn kong têa ê vâ gum mơnhông cheăng kâ rêh ối pơlê pơla dêi tơnêi têa, kong pơlê ƀă mâu khu mơdró kâ, pôa Lê Minh Hưng, Ngế pro xiâm hnê ngăn tơnêi têa pơkâ thế cheăng hbrâ rơnáu athế pêi pro nhên.

Tơdjâk troh cheăng hnê tối, rơkê plĕng gum hbrâ hơnăm 2027, Ngế pro xiâm hnê ngăn Chin phuh pơkâ thế mâu khu ki hnê tối, tơdroăng ki tơkŭm pêi pro klêi mâu tơdroăng cheăng, malối cho mâu tơdroăng ki gum tung cheăng dêi khu kăn xiâm Việt Nam veăng ai mâ a Măng tĭng khu râ kăn xiâm APEC 2026 a Sinuâ ƀă tơdroăng ki pơcháu hnoăng pro kăn xiâm hnê ngăn APEC 2027.