Kơxê lơ 29/9, a Tíu pêi cheăng Chin phuh, Khu pơkuâ tơdroăng cheăng Đảng ủi Chin phuh ƀă Khu pơkuâ Đảng ủi Kuô̆k hô̆i tơkŭm po hôp tơno tơdroăng klâ séa ngăn tơdroăng pêi pro, kêi đeăng mâu tơdroăng tơkêa bro luât, tơdroăng pơkâ ƀă mơ-éa tơbleăng hbrâ tơbleăng Kuô̆k hô̆i a Hneăng hôp má 2, Kuô̆k hô̆i hneăng má XVI. Pôa Lê Minh Hưng, Ngế pro xiâm hnê ngăn Chin phuh ƀă pôa Trần Thanh Mẫn, Kăn xiâm hnê ngăn Kuô̆k hô̆i rơtế pơkuâ hôp tơno tơdroăng kal. A hneăng hôp kố, Chin phuh tiô tối hdrối tơbleăng Kuô̆k hô̆i 95 mơ-éa ai ‘noăng chư chêh, mơ-éa chêh ƀă tơbleăng, ting mê ai 44 luât ƀă tơdroăng pơkâ, mê cho 7 luât mơjiâng nếo, 36 luât ‘mâi rơnêu, tơ’nôm ƀă 1 tơdroăng pơkâ.

Chin phuh dế thâ hbrâ hô sơ troăng hơlâ mơ’no liăn cheăng ăm mâu tơdroăng tơkêa bro tơnêi têa ối tung hnoăng Kuô̆k hô̆i séa ngăn. Pôa Lê Minh Hưng, Ngế pro xiâm hnê ngăn tơnêi têa tối nhên, hnoăng cheăng pêi hên, hên tơdroăng tơkêa bro luât ai tơdjâk tơdrêng troh kuăn pơlê ƀă khu mơdró, môi tiah Luât tơnêi tơníu, Luât liăn ngân Tơnêi têa, Luât 'no liăn cheăng tơdjuôm, Khu luât xôi kân ƀă Khu luât tơleăng tơdroăng xôi kân.