Kơxo lơ 21/09, a Tíu pêi cheăng Chin phuh, pôa Lê Minh Hưng, Ngế pro xiâm hnê ngăn tơnêi têa pơkuâ rôh pêi cheăng ƀă Khu xiâm pơkuâ Hnê hriâm ƀă Hnê mơjiâng tuăn ngôa rơkê ƀă Hnê mơjiâng rơtế mâu khu xiâm, kơvâ cheăng ai tơdjâk tơkŭm lêi tah mâu tơdroăng ki thâ ôh tá bê kơxop hlá mơ-éa hriâm ăm hơnăm hriâm 2026 – 2027; séa ngăn tơdroăng hriâm, kơxop mơ-éa hnê hriâm phôh thong ƀă hbrâ Khu râ kăn séa ngăn tơdroăng cheăng pêi pro Tơdroăng xiâm tơbleăng a rôh hôp kơxô̆ 71 hâi lơ 22/8/2025 dêi Khu xiâm kal kí ‘na mơnhông hnê hriâm ƀă hnê mơjiâng tuăn ngôa rơkê.

Pôa Lê Minh Hưng, Ngế pro xiâm hnê ngăn tơnêi têa tối nhên, hơnăm 2026 – 2027 cho hơnăm apoăng lâp tơnêi têa pêi pro khu kơxop hlá mơ-éa môi tuăn sap apoăng troh tá tui lui tung lâp tơnêi têa.

Mơhé Kăn xiâm pơkuâ hnê ngăn Đảng, Tơnêi têa ƀă Chin phuh hiăng hnê mơhno sap ing apoăng, la mơhé hiăng mot tung hơnăm hriâm nếo vâ chê môi khế, a mâu kong pơlê xuân ối ai tơdroăng hok tro ôh tá ai hlá mơ-éa hriâm. Tiô tối tơbleăng, kơxô̆ hlá mơ-éa hriâm ối kal dâng 776.000 kơxop hlá mơ-éa (châ 0.31%), Ngế pro xiâm hnê ngăn tơnêi têa tối nhên, kố cho tơdroăng ki kal châ pơlê pơla tơmâng khât, pơkâ thế Khu xiâm ngăn hnê hriâm ƀă hnê mơjiâng tuăn ngôa rơkê tơrŭm krá ƀă mâu kong pơlê, Khu xiâm ngăn Hnê hriâm ƀă Hnê mơjiâng tuăn ngôa rơkê séa ngăn nhên rêm kơxop hlá mơ-éa, môn hriâm ki ối kal vâ ai troăng hơlâ tơleăng mơnhên, vâ tơniăn ai tŭm hlá mơ-éa tung pơla rĕng má môi.