VOV4.Xơ Đăng - Kơxo lơ 12/1, a Hà Nội, Khu Séa ngăn Chin phuh tơkŭm po Mơgêi hnoăng cheăng hơnăm 2021 ƀă tơbleăng hnoăng cheăng hơnăm 2022. Pôa Lê Minh Khái, kăn pơkuâ ngăn Tíu xiâm Đảng, Ngế pro xiâm phŏ hnê ngăn Chin phuh prếi pôa Đoàn Hồng Phong, kăn xiâm Séa ngăn Chin phuh rơtế pơkuâ po rôh hôp tiô tơdroăng ki ‘no tơdrêng ing troăng hyôh Internet a mâu tíu ki mơ’no tung lâp tơnêi têa.

Pôa Lê Minh Khái, Ngế pro xiâm phŏ hnê ngăn tơnêi têa veăng hôp a Rôh mơgêi kơvâ Séa ngăn Chin phuh

Tơpui a rôh hôp, pôa Lê Minh Khái, Ngế pro xiâm phŏ hnê ngăn tơnêi têa pơkâ thế, tung la ngiâ ah kơvâ séa ngăn kal pơtối pêi pro kơtăng tơdroăng pơkâ thế dêi Khu hnê mơhno cheăng Tơnêi têa ‘na hbrâ mơdât kâ kơluâ, pơkâ troăng hơlâ pêi cheăng séa ngăn hơnăm 2022 ƀă pơkâ troăng ăm kơva Séa ngăn hơnăm 2022.

Kơvâ cheăng kal rah xo mâu tơdroăng ki kal, tơdroăng cheăng ki châ kuăn pơlê tơmâng ngăn vâ tơbleăng pêi pro, sap ing mê vâ ‘mâi rơnêu, tâng hlo ai tơdroăng ki ôh tá tro kal pơxâu phak kơtăng tiô pơkâ dêi luât.

Katarina Nga tơplôu ƀă tơbleăng