A rôh hôp, mâu khu xiâm, kơvâ cheăng, kong pơlê tối tơbleăng tơdroăng, mâu tơdroăng ki xơpá, tơvâ ƀă mơ’no mâu túa pơkâ vâ mơdêk ki tơƀrê tung tơdroăng cheăng dêi mâu tíu hnê hriâm klêi kơ’nâi ‘mot tơkŭm. Tiô Khu xiâm ngăn hnê hriâm ƀă hnê mơjiâng tuăn ngôa rơkê, troh nôkố, tung lâp tơnêi têa ối 281 to tíu hnê hriâm cheăng dêi tơnêi têa, kơdroh 33 tíu, tơ’mô ƀă 10,5% tâng vâ pơchông ƀă mơ’nui khế 7. Hnê hriâm đăi hok nôkố ai 130 tíu hnê hriâm kong lâp, kơdroh 3 tíu.

Mơgêi rôh hôp, pôa Lê Tiến Châu, Phŏ Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng, kong pơlê rĕng pêi pro klêi túa pơkâ, mơnhên nhên tíu ki ối rak, ‘mot tơkŭm, pơtê lơ pơcháu xúa ăm cheăng ki ê, rak tơniăn pro klêi hdrối hâi lơ 1/10/2026; tơdrêng amê, hlối pôi tá tá ăm tơdroăng ‘mot tơkŭm tơdjâk troh tơdroăng cheăng hnê ƀă hnoăng pơxúa ăm ngế ki hriâm.