VOV4.Xơ Đăng - Kơxê lơ 11/2, pôa Lê Văn Thành, Ngế pro xiâm phŏ hnê ngăn tơnêi têa hiăng hôp ƀă mâu khu xiâm, kơvâ cheăng ‘na tơdroăng pơtroh hbrâ ăm ‘no liăn pêi mâu tơdroăng tơkêa pro troăng kân tơdrăng lĕm pơxiâm mơjiâng pro nếo tung pơla hơnăm 2021-2025. Ing mê, tối tơbleăng dêi khu xiâm ngăn troăng prôk rơxế kơtâu, tung 5 tơdroăng tơkêa bro ki kal dêi tơnêi têa ai 3 tơdroăng tơkêa pro troăng kân pơkuâ mơjiâng peo: troăng kân tơdrăng lĕm Biên Hòa - Vũng Tàu; troăng kân Châu Đốc - Cần Thơ - Sóc Trăng ƀă troăng kân tơdrăng lĕm Kháng Hòa - Buôn Ma Thuột ƀă 2 tơdroăng tơkêa bro dêi kong pơlê pơkuâ mê cho: Tơdroăng tơkêa bro troăng tâ tá 4 - cho troăng kân kơtâu tung kơpong pơlê kong xiâm Hà Nội ƀă tơdroăng tơkêa bro troăng kân 3 cho troăng kân kơtâu tung kơpong Pơlê kong kân Hồ Chí Minh tơdrêng ƀă 4 tơdroăng tơkêa bro Nhóm A.

Tối mơgêi hneăng hôp, pôa Lê Văn Thành tối nhên, mơdêk pro troăng kân tơdrăng lĕm kô kum mơnhông mơdêk cheăng kâ rêh ối dêi tâi tâng mâu kong pơlê ki ai troăng kân tơdrăng lĕm tơkâ luâ. Tâng rĕng tơbleăng pêi, malối tung tơdroăng ‘mâi xĕn hngêi trăng tơnêi kô kơdroh hên kơxô̆ liăn. Ngế pro xiâm phŏ hnê ngăn tơnêi têa ăm ‘nâi, Chin phuh, Kuô̆k hô̆i, malối cho Khu xiâm kal kí hiăng tối mơgêi ing nôkố ta troh hơnăm 2025 kum pêi ahdrối vâ mơnhông tơ-ƀrê troăng kân ki tơdrăng lĕm.

Gương tơplôu ƀă tơbleăng