VOV4.Xơ Đăng - Kơxo lơ 23/1, a Thái Bình, pôa Lê Văn Thành, Ngế pro xiâm phŏ hnê ngăn tơnêi têa pơkuâ djâ khu kăn cheăng tung Chin phuh ‘na tơdroăng séa ngăn tơdroăng tơkêa bro hngêi kơmăi on tơhrik Thái Bình 2, malối cho todroăng  chôu on rôh apoăng a tôh kơmăi kơxô̆ 1 dêi hngêi kơmăi ƀă ai rôh pêi cheăng ƀă kăn xiâm dêi Grup ngăn ‘na hrik chuâ têa châu tơnêi têa Việt Nam (PVN), ki xiâm pơkuâ tơdroăng tơkêa bro.  Pôa Lê Văn Thành tối nhên 2 kơlo pêi pro la ngiâ cho mơ-eăm tơrŭm tung Tôh kơmăi kơxô̆ 1 a hâi lơ 30/4/2022 ƀă chôu on rôh apoăng a tôh kơmăi kơxô̆ 1 a hâi lơ 16/6/2022.

Troh nôkố, tơdroăng pêi tơdroăng tơkêa bro hiăng châ 88,75%, tung mê tơdroăng vế hdró châ vâ chê 100%; rôe tơmeăm vâ chê 96%, pro krâ pơklêp vâ châ 88%; mơnúa ăm kơmăi kơtâu ngăn châ vâ chê 26%. Malối cho Khu mơjiâng pro ăm kơmăi mơnúa kơtâu xuân mơhnhôk mâu kŏng nhân tung rôh pơtê Têt Lo hơnăm nếo ƀă hiăng pơtối mơdêk hnoăng cheăng pêi klêi pơtê Têt vâ tơniăn tơdroăng cheăng pêi tro tiô pơkâ.

Kơnôm ing mê, Tơdroăng tơkêa bro hiăng pêi châ troh a kơlo “Chôu on rôh apoăng ƀă têa châu” a hâi lơ 23/2 ăm tôh kơmăi kơxô̆ 1. Kố cho kơlo ki hdró kal khât tung tơdroăng vâ pê klêi mâu kơlo ki hdró gá tơmot ƀă dêi rơpó a hâi lơ 19/5 ƀă hlối chôu on ƀă kơchâ a hâilơ 16/6/2022.

Gương tơplôu ƀă tơbleăng