Klêi kơ’nâi tơmâng tơbleăng ƀă mâu rơkong tơpui tơno, pôa Lương Cường, Kăn xiâm hnê ngăn tơnêi têa tối nhên, ing pơkuâ dêi Đảng, mâu hơnăm hiăng hluâ, tơdroăng luât tơnêi têa pin hiăng ai mâu troăng mơnhông mơdêk hên, châ tơƀrê kal khât tung rêm tơdroăng cheăng; khu tơrŭm cheăng, tơdroăng pêi cheăng dêi mâu kơ koan hnê arak luât đi đo châ pơhlêh nếo, pêi kêi đeăng, xêt khât, châ tơƀrê tâ.

Ing mê, tung la ngiâ, tơdroăng ‘mâi rơnêu luât pơtối châ pêi pro Pơkâ kơxô̆ 27 – NQ/TW ‘na mơjiâng Tơnêi têa tiô luât xah hô̆i chuh ngiah Việt Nam tung hneăng nếo; mơ-eăm mơjiâng luât rơkê, tiô rơxông nếo, tơdâng tơ’mô, kơtăng, tơdrăng lĕm, pêi cheăng ăm Tơnêi têa, pêi cheăng ăm kuăn pơlê. ‘Na tơdroăng hbrâ ăm roh hôp, má môi hơnăm 2025 dêi Khu hnê mơhno ‘mâi rơnêu luât Tơnêi têa, Kăn xiâm hnê ngăn tơnêi têa tối rơdêi, tơdroăng ‘mâi rơnêu luât thế tiô troăng hơlâ, troăng prôk dêi Đảng, tơniăn ki tơdâng tơ’mô, môi tuăn pơla mâu troăng hơlâ luât, kum mơdêk châ tơƀrê tơdroăng cheăng luât, mơjiâng Tơnêi têa luât tiô xah hô̆i chuh ngiah.