Klêi kơ’nâi tơmâng mâu rơkong tơpui tối tơbleăng, pơkâ thế, pêi pro mâu hnoăng cheăng dêi kăn teăng mâ kăn pơkuâ mâu tíu pêi cheăng ki tơdjâk, xông tơpui mơgêi a roh hôp, pôa Lương Cường, Kăn xiâm hnê ngăn tơnêi têa pơchân tối mâu hnoăng cheăng ki xiâm tung la ngiâ, tung mê ai pơkâ Ƀơrô hbrâ lĕm tro mâu tơdroăng ki xiâm kum Kăn xiâm hnê ngăn tơnêi têa, Phŏ Kăn hnê ngăn tơnêi têa veăng Hneăng hôp roh má 13 Khu pơkuâ xiâm Đảng hneăng má XIII; hneăng hôp má 10 Kuô̆k hô̆i hneăng má XV la ngiâ.

Kăn xiâm hnê ngăn tơnêi têa pơkâ Ƀơrô mơdêk tâ mê nếo ki dâi lĕm pêi cheăng tơbleăng tung mâu kơvâ tung khu, pa kong; teăm tơdrêng tơbleăng mâu tơdroăng xiâm tơtro nôkố, ai ki trâu, tơniăn tơdroăng ƀă ki dâi lĕm tơdroăng cheăng.