Kăn xiâm hnê ngăn tơnêi têa pơkâ tơdroăng hbrâ, tơkŭm po hneăng hôp Đảng ƀô̆ mâu râ thế châ mâu khu râ kăn pơkuâ, hnê mơhno tơkŭm pêi pro tiô tro pơkâ, tro pơkâ dêi Đảng. Pơchân tối tơdroăng tơkŭm po hneăng hôp kal tơtrŏng tơkŭm po tơpui tơno inhên, trâu hơhngế, veăng tơpui inhên châ tơƀrê mơ-éa chêh hdrối mâu mơ-éa; tơbleăng kal kí thế mơnhên tro tơdroăng pêi pro Pơkâ hneăng hôp hneăng hdrối, ki má lối cho mâu hnoăng cheăng ki xiâm, hnoăng cheăng mơjiâng, pơhlêh tơtro tung Đảng.

Ƀă hnoăng cheăng mơgêi Pơkâ 18, Kăn xiâm hnê ngăn tơnêi têa pơkâ khu pêi cheăng tơnêi têa kal pêi cheăng lĕm tro tâ, châ tơƀrê tâ, tơxâng lĕm tâ tiô pơkâ, kơvâ cheăng, hnoăng cheăng dêi Ƀơrô Kăn xiâm hnê ngăn tơnêi têa. Tơdroăng pêi pro rah xo bro lế lĕm tro khu râ kăn pêi cheăng tơnêi têa kal tơmâng rơkong tơpui, pói vâ, tŏng gum tơdroăng rêh ối dêi kăn ƀô̆, kŏng chưk, viên chưk, mơngế pêi cheăng dêi kơ koan, tíu cheăng hmiân tuăn, mơ-eăm kêi đeăng lĕm tro má môi hnoăng cheăng châ pơcháu.