A rôh pêi cheăng, klêi kơ’nâi hmâng pơchuât tơbleăng mâu tơdroăng ki kal hiăng tối, tơdrêng amê hlối tối nhên pơkâ thế pêi pro kơtăng trâu hngế, ‘nâi nhên mâu troăng hơlâ, tơdroăng hnê mơhno dêi Khu xiâm pơkuâ tơdroăng kal kí, Khu xiâm pơkuâ hnê ngăn Đảng, xuân môi tiah mâu troăng hnê mơhno dêi mâu kơ koan ai tơdjâk troh ƀă tơdroăng tơkŭm po mâu tơdroăng cheăng a rôh Têt Lo hơnăm nếo Bính Ngọ.

Kăn xiâm hnê ngăn tơnêi têa tối nhên, kal hbrâ rơnáu tro mâu tơdroăng ki tŏng gum kuăn pơlê ro a rơnó Hơngui tơdah Têt tiô khôi hmâ Bính Ngọ hơnăm 2026 tơniăn, rơdêi, kơdĭng, pro chiâng tơdroăng ki hơniâp ro ƀă cho ivá ăm tâi tâng Đảng, tâi tâng kuăn pơlê, tâi tâng khu lêng mơ-eăm pêi pro ƀlêi chiâng Pơkâ Hneăng hôp Khu kăn lâp tơnêi têa rôh má XIV dêi Đảng sap ing mâu khế apoăng dêi hơnăm 2026.

Tơkŭm po tro tơdroăng lăm pôu kơ-êng, mơhnhôk, rơkâu Têt mâu kăn ƀô̆ hdrối nah, Jâ Nôu Việt Nam khên tơnôu, mố đô̆i tro rong, mố đô̆i châi tamo, rơpŏng ai mố đô̆i hlâ, rơpŏng ai hnoăng ƀă kăch măng, rơpŏng châ tơnêi têa tŏng gum, mâu ngế ki rơkê, văn ngê̆ sih, ngế ki châ kuăn pơlê loi tung hdroâng kuăn ngo, mâu ƀok xối jâ chĭng, mâu tíu pêi cheăng khu lêng kring vế, khu ki pêi dêi hnoăng cheăng tung rôh Têt a tíu tơkăng kong, chuăn rơlố, kơpong hngế hngo, kơpong xơpá ƀă hên mâu ki ê rak vế tơniăn rêm hngêi, rêm ngế kuăn pơlê pơrá châ ro rơnó Hơngui, tơdah Têt.