Kăn xiâm hnê ngăn tơnêi têa tối nhên, Việt Nam đi đo mơ-eăm ngăn ASEAN cho kơjo gum tung la ngiâ tung troăng hơlâ tơpui kâ ƀă đi đo mơeăm tâi ivá tơná rơtế ƀă mâu kong têa ASEAN mơjiâng pơlê pơla ASEAN tơrŭm, krá rơdêi, ai hnoăng cheăng, tíu cheăng rế hía rế kân tung lâp plâi tơnêi. Kăn xiâm hnê ngăn tơnêi têa tối rơdêi Việt Nam môi tuăn toưng gum Malaysia rak vế ƀlêi chiâng hnoăng cheăng pro kăn xiâm hnê ngăn ASEAN hơnăm 2025 ƀă rơkâu Malaysia pơtối pơkuâ djâ ASEAN pêi châ mâu tơdroăng ki ƀlêi chiâng kân, tơmiât troh môi ASEAN “Krá tơniăn ƀă Tŭm têk” tro tiô pơkâ inâi dêi ASEAN.

Kăn xiâm hnê ngăn tơnêi têa tối nhên, tung pơla ai rôh ôh tá tơniăn, hơkăng a hên tíu, mâu kong têa tơrŭm tung ASEAN kal pơtối tơdjuôm ivá rak vế tơdroăng ki hơniap lĕm gum mơnhông; mơdêk tơrŭm cheăng krá rơdêi tâ pơla mâu kong têa.