A rôh tơdah, Kăn xiâm hnê ngăn tơnêi têa tối nhên, Việt Nam đi đo ngăn nhuô̆m ƀă rơhêng vâ thăm mơnhông tơrŭm ƀă Hungary, kong têa kơjo apoăng, tơdrêng amê hlối cho Kong têa tơrŭm tŭm tơdroăng ki apoăng dêi Việt Nam a Trung Đông Âu. Mơnhên tối khât klêi kơ’nâi rôh tơpui tơno pơla pôa Trần Thanh Mẫn, Kăn xiâm hnê ngăn Kuô̆k hô̆i Việt Nam prế Kăn xiâm hnê ngăn Kuô̆k hô̆i Hungary.

Pôa Lương Cường, Kăn xiâm hnê ngăn tơnêi têa rơhêng vâ kơ koan mơjiâng luât péa tơnêi têa pơtối rơtế tơrŭm vâ mơjiâng troăng hơlâ luât, pro tơ’lêi hlâu ăm mâu tơdroăng mơ-eăm mơnhông tơrŭm cheăng pơla péa tơnêi têa, pêi châ tiô tơdroăng púi vâ ki pơxúa tơdjuôm dêi péa tơnêi têa, veăng gum tung hơniâp lĕm, rak tơniăn, tơrŭm ƀă mơnhông a kơpong ƀă lâp plâi tơnêi. ‘Na tơrŭm hên kơvâ cheăng, péa ngế kăn xiâm hnê ngăn tối nhên, Việt Nam ƀă Hungary kô pơtối tơrŭm krá tơniăn ƀă tŏng gum dêi rơpó a mâu rôh hôp ki hên kơvâ, malối cho a Khu lâp kong têa, tung rôh hôp ASEAN-EU; tơdrêng amê hlối tối rơdêi môi tuăn túa tơmiât krê tơleăng mơnhên mâu tơdroăng tơxup tơbriât ƀă troăng hơlâ hơniâp lĕm, tung tơdroăng ki loi nhuô̆m luât lâp plâi tơnêi, vâ rak tơniăn, gâk kring a rêm kơpong.