Ngế xiâm tơpui kâ Lếo mơhno hiâm mơno Đảng, Tơnêi têa ƀă kuăn pơlê Việt Nam đi đo môi tuăn tŏng gum, đi đo tơrŭm rơtế Đảng, Tơnêi têa ƀă Kuăn pơlê mâu hdroâng kuăn ngo Lếo. Pôa Lương Cường, kăn xiâm hnê ngăn tơnêi têa loi tiah kố ƀă ki rơkê plĕng dêi tơná ƀă tơdroăng pêi cheăng hiăng ton, rơtế ƀă hiâm mơno tơniăn lĕm dêi ngế xiâm tơpui kâ ƀă Việt Nam, tung hnoăng cheăng dêi tơná, ngế xiâm tơpui kâ Lếo kô ai hên ivá veăng gum kơhnâ ăm tơrŭm cheăng pơla péa tơnêi têa.

Kăn xiâm hnê ngăn tơnêi têa mơnhên tối khât klêi kơ’nâi tơrŭm cheăng pơla péa ngế xiâm tơpui kâ tung pơla hdrối nah, veăng gum pro pơxúa ăm tơdroăng thăm mơdêk tơrŭm cheăng pơla péa pâ; mơnê ngế xiâm tơpui kâ Lếo hiăng tơmâng ngăn, pro tơ’lêi hlâu ăm kuăn pơlê Việt Nam a Lếo pêi cheăng kâ, rêh ối tơniăn a Lếo, kơhnâ veăng mơjiâng tơnêi têa Lếo rế hía rế kro mơdrŏng ƀă pro kông tơdjêp ƀă tơbêng ăm tơrŭm cheăng Việt Nam – Lếo.

Péa ngế kăn xiâm tối hâk ro ‘na mâu tơdroăng ki hiăng pêi pro châ tơƀrê kal dêi tơrŭm cheăng pơla péa pâ tung pơla hdrối nah, malối cho loi tơngah tung tơdroăng kal kí, pơtối châ thăm mơdêk tơrŭm cheăng lêng, gâk kring pơtối cho tíu ki xiâm kal khât dêi tơrŭm cheăng pơla péa pâ.