Kơxê lơ 10/9 a Tíu pêi cheăng Kăn xiâm hnê ngăn tơnêi têa, pôa Lương Cường, Kăn xiâm hnê ngăn tơnêi têa ƀă kơdrâi pôa hiăng pơkuâ Leh tơdah kân krip jâ Sam Mostyn, Kăn pôu râng tâi tâng hnoăng kong têa Australia ƀă kơnốu jâ lăm pôu râ Tơnêi têa troh Việt Nam.

Klêi kơ’nâi Leh tơdah păng ‘nâng, pôa Lương Cường, Kăn xiâm hnê ngăn tơnêi têa hiăng tơpui tơno ƀă jâ Sam Mostyn. Péa pâ tối tơdroăng mơdêk tơrŭm cheăng to Khu tơrŭm cheăng ton xŏn tâi tâng khế 3/2024 cho môi troăng prôk ki ƀlêi trâng, djâ tơrŭm cheăng pơla péa pâ mơnhông ó rơdêi. Péa tơnêi têa cho khu tơrŭm tê mơdró kân dêi pó ƀă pêi lo liăn tê mơdró châ lối 14 rơtal dollars hơnăm 2024, kơxô̆ tơmối ôm hyô péa pâ tâk tơdâng ing mâu hơnăm.

Mâu khu tê mơdró dêi Australia hiăng ƀă dế pro tơ’lêi hlâu vâ mơnhông mơ’no liăn cheăng tê mơdró a Việt Nam. Việt Nam hiăng chiâng kông tơdjêp vâ Australia thăm tơdjêp ƀă kơpong Đông Nam Á, kum mơdêk tơrŭm cheăng ton xŏn tâi tâng Australia – ASEAN ƀă tơrŭm păng ‘nâng pơla Australia ƀă Kơpong Mekong. Kăn pôu râng tâi tâng hnoăng Australia kheăn kơdeăn tơdroăng veăng kum ki kal dêi pơlê pơla dâng 350.000 ngế Việt Nam a Australia, vâ chê 40.000 sinh viên Việt Nam dế hriâm tâp, hriăn plĕng a Australia; tối rơdêi trâm mâ kuăn pơlê trâu hơngế cho xiâm kối krá tơniăn dêi tơrŭm cheăng pơla péa pâ.

Péa pâ môi tuăn pêi pro ó rơdêi tâ mâu troăng vâ thăm tơrŭm cheăng kâ pơla péa pâ, tơmiât troh pơkâ pêi lo liăn tê mơdró 20 rơtal dollars ƀă tâk châ péa xôh mơ’no liăn cheăng pơla péa pâ tung mâu hơnăm la ngiâ

Australia pơtối tơrŭm krá tơniăn, môi tuăn troăng pơkâ pêi dêi Việt Nam ƀă ASEAN tung tơniăn gâk kring, tơniăn pơlê pơla ƀă tơniăn lĕm troăng têa kơxĭ, troăng tơƀai a Biển Đông; tơleăng tơxup tơbriât ƀă mâu troăng hơniâp lĕm tiô tơdroăng nhuô̆m luât lâp plâi tơnêi.