A rôh tơpui tơno, pôa Lương Cường - Kăn xiâm hnê ngăn tơnêi têa tối nhên, Việt Nam đi đo môi tuăn ó rơdêi, tŭm têk ƀă Lếo ƀă kô pêi tâi ivá tơná rơtế ƀă Đảng, Tơnêi têa ƀă kuăn pơlê Lếo rak vế, tơbêng ƀă pro trâu hngế tâ nếo tơrŭm cheăng pơla Việt Nam – Lếo. Kăn xiâm hnê ngăn tơnêi têa pin tối rơdêi tơrŭm cheăng Việt Nam – Lếo cho tơdroăng ki kal tơdjuôm kơnía, cho tíu tŏng gum tơdroăng cheăng tung la ngiâ ăm tơdroăng tơniăn, mơnhông ƀă tơrŭm cheăng dêi rêm kong têa, tơdrêng amê hlối pơtối rak vế, mơnhông ƀă hnê pơtó ăm mâu rơxông xo ah hmôi.

Tơpui tơno ‘na túa pơkâ tơrŭm cheăng tung la ngiâ, Kăn xiâm hnê ngăn tơnêi têa pin ăm ‘nâi péa pâ pơtối mơnhên tơrŭm cheăng tung la ngiâ tung tơrŭm cheăng kal kí cho xiâm, rak hnoăng cheăng pơkâ tơmiât pêi tâi tâng am tơrŭm cheăng pơla péa pâ.