Péa Kăn xiâm pơkuâ tối phiu ro hdrối mâu tơdroăng châ tơƀrê lĕm tung tơrŭm cheăng pơla péa tơnêi têa, môi tuăn pơtối pêi trâu hơngế tâ tơrŭm Khu tơrŭm cheăng ton xŏn tâi tâng, tơmiât troh mơjiâng Pơlê pơla tối tơdroăng la ngiâ Việt Nam – Sinuâ.

Pôa Lương Cường, Kăn xiâm hnê ngăn tơnêi têa pơkâ thế thăm trâm mâ khu râ kăn xiâm, mơdêk tơrŭm păng ‘nâng tung mâu kơvâ cheăng: khoa hok – kŏng ngê̆, pơhlêh nếo tơmiât pêi rơkê, hnê mơjiâng mơngế pêi cheăng, tơdjêp troăng klông ton xŏn, tơrŭm cheăng kâ – tê mơdró, hnê hriâm ƀă ôm hyô.

Pôa Tập Cận Bình tối rơdêi kal rĕng tơkŭm po Roh hôp má môi dêi Vi ƀan tơrŭm cheăng troăng rơxế tơdrêng, tơdrêng amê mơdêk trâm mâ tơpui tơno khu râ kăn xiâm, tối ăm dêi pó túa ki rơkê tơtro mơjiâng Đảng, pơkuâ tơnêi têa. Péa pâ xuân môi tuăn pêi pro mâu tơdroăng tung Hơnăm trâm mâ tơno rơkê leh tơbâ 75 hơnăm mơjiâng tơrŭm tơpui kâ.