Kơxê măng lơ 3/9, a Bắc Kinh, Sinuâ, mơgêi tơdroăng trâm mâ pơla péa pâ, pôa Lương Cường, Kăn xiâm hnê ngăn tơnêi têa hiăng trâm mâ pôa Vladimir Putin, Kăn xiâm pơkuâ kong têa Rusi.

Kăn xiâm hnê ngăn tơnêi têa mơnhên Việt Nam ngăn tơrŭm cheăng ƀă Rusi, tŏng gum Rusi mơnhông tơniăn, ó rơdêi ƀă mơnhông hnoăng ki tro tung lâp plâi tơnêi, hbrâ mơdêk tơrŭm cheăng pơla Rusi – ASEAN.

Kăn xiâm hnê ngăn tơnêi têa tối rơdêi, Việt Nam phiu ro khu tê mơdró Rusi mơ’no liăn cheăng a mâu kơpong hngêi kơmăi kơmok, tơrŭm cheăng pro pơkeăng, kơmăi kơmok kŏng ngê̆... Péa Kăn xiâm môi tuăn pro i krá tâ tơrŭm cheăng kal kí – tơpui kâ ƀă kong têa ê, pêi pro châ tơƀrê mâu tơdroăng môi tuăn tung roh lăm pôu dêi pôa Putin, Kăn xiâm pơkuâ têa Rusi troh Việt Nam khế 6/2024 ƀă roh lăm pôu Rusi dêi pôa Tô Lâm, Kăn xiâm pơkuâ hnê ngăn Đảng khế 5/2025.

Tơdrêng amê thăm tơpui tơno râ kăn xiâm. Péa pâ mơnhên tơdroăng khŏm mơ-eăm mơdêk râ tơrŭm cheăng kâ - tê mơdró, mơ’no liăn cheăng, tơxâng ƀă tơrŭm cheăng kal kí lĕm tro ƀă tơmeăm ki ai hlâu kân kĭn dêi rêm tơnêi têa.