Kơxo lơ 3/9, Sinuâ tơkŭm po kân krip Leh ăm lêng prôk pơtăng tơbâ 80 hơnăm ƀlêi trâng phát xít dêi kuăn pơlê lâp plâi tơnêi a Plông kân Thiên An Môn a pơlê kong xiâm Bắc Kinh. Tiô rơkong krếo thế dêi Kăn xiâm pơkuâ hnê ngăn xiâm Đảng Kŏng san Sinuâ, Kăn xiâm hnê ngăn tơnêi têa Sinuâ – pôa Tập Cận Bình, pôa Lương Cường, Kăn xiâm hnê ngăn tơnêi têa pin ƀă khu kăn xiâm Việt Nam veăng ai mâ a Leh tơbâ.

Tơpui koh hâk a leh tơbâ, pôa Tập Cận Bình, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa mơhno tơdroăng mơnê pleăng dêi mâu mố đô̆i hneăng hdrối hiăng veăng tơplâ, xuân môi tiah hiăng môi tuăn tŏng gum dêi mâu vâi pú kong têa ê veăng tơplâ, xuân môi tiah tơdroăng môi tuăn dêi vâi pú kong têa ê hâk vâ hơniâp lĕm tung rôh tơplâ xâ chuh ngiah phát xít.

Pơtối mê, rôh ăm lêng prôk a troăng ƀă tơdroăng ki veăng dêi mâu pháu hnêa chal nếo tung khu Lêng tơleăng Kuăn pơlê Sinuâ ai 45 khâu tơkŭm drô troăng Trường An. Hdrối mê, pôa Lương Cường, Kăn xiâm hnê ngăn tơnêi têa pin hiăng veăng ai mâ a leh tơdah ƀă xup um tơdjuôm ƀă mâu ngế pơkuâ khu ki veăng a Leh tơbâ 80 hơnăm Ƀlêi trâng phát xít dêi kuăn pơlê lâp plâi tơnêi xua pôa Tập Cận Bình, Kăn xiâm pơkuâ hnê ngăn cheăng Đảng, Kăn xiâm hnê ngăn kong têa Sinuâ pơkuâ po.