Tơbleăng a rôh leh tơbâ, Pôa Lương Cường - Kăn xiâm hnê ngăn tơnêi têa tối, tung plâ 80 hơnăm mơjiâng, mơnhông ƀă xông tơƀrê, ing hnoăng pơkuâ dêi Đảng, mâu Khu cheăng tơleăng Việt Nam hiăng rơtế ƀă hdroâng mơngế ƀă ai mâu hnoăng veăng ‘no hên hĭn tung rôh plâ xâ Pơhlăng, xâ Mih ki tơbriât pơkuâ, pro tơleăng lĕm hdroâng mơngế, lâp tơnêi têa tơrŭm hdrối nah, xuân môi tiah tung tơdroăng pêi cheăng mơnhông hlối veăng kring vế Tơnêi têa nôkố.

Pôa Lương Cường loi khât, ƀă ‘nâi tơrŭm dêi rơpó, hriăn plĕng ki nếo ƀă ‘nâi hnoăng cheăng pêi tơná, mâu Khu cheăng tơleăng Việt Nam kô pơtối rak vế tơdroang ki lĕm 80 hơnăm hdrối; ôh tá la lâi pơtê hriâm, rơnêu pât, mơnhông pêi pro tơdroăng ki lĕm kal kí, hiâm mơno lĕm vâ khât ƀă tơdroăng cheăng, tuăn ngôa rơkê, hlối kơkê tung tơdroăng cheăng ‘na luât, khên tơnôu pêi tro hnoăng cheăng dêi tơná vâ pêi tro hnoăng cheăng ki pơcháu; kring vế tơdroăng ki ‘ló tro, râk luât, kring vế hnoăng rêh ối lĕm tro dêi kuăn mơngế, hnoăng pêi pro ƀă ki ai pơxúa tơtro dêi Kuăn pơlê, dêi Tơnêi têa ƀă pơlê pơla, veăng ‘no hnoăng a tơdroăng mơnhông tơnêi têa tung chal nếo nôkố.