Klêi kơ’nâi tơmâng mâu rơkong tơpui tối, pâ thế dêi kuăn pơlê, tơpui a rôh hôp, pôa Lương Cường, Kăn xiâm hnê ngăn tơnêi têa ăm ‘nâi, Hneăng hôp má 10, Kuô̆k hô̆i hneăng XV la ngiâ kố ah cho hneăng hôp má mơ’nui dêi hneăng, cho kal khât, rế mơgêi tơdroăng cheăng pêi plâ hơnăm, rế pơkâ troăng tơmiât pêi ăm hneăng mơnhông nếo; tung mê Kuô̆k hô̆i kô séa ngăn, pơkâ hên tơdroăng ki kal, ai dâng 50 tơdroăng tơkêa luât, tơdroăng pơkâ ƀă 13 khu tơdroăng ki kal kân ‘na cheăng kâ rêh ối pơlê pơla, rơtế ƀă hên tơdroăng kal ki ê.

Tối nhên rêm tơdroăng ki ƀlêi chiâng dêi tơnêi têa, dêi Pơlê kong kân pơrá ai ivá veăng gum kơnâ dêi vâi krâ kuăn pơlê, Kăn xiâm hnê ngăn tơnêi têa rơhêng vâ vâi krâ kuăn pơlê pơtối mơdêk khôi hmâ kăch măng tơdrăng, tơrŭm, môi hiâm mno rơtế ƀă lâp tơnêi têa, tơdjuôm ivá mơjiâng Pơlê kong kân Hồ Chí Minh rơkê, tơƀrê, tơrŭm; mơjiâng tơnêi têa pin rế hía rế kro rơdêi, khên tơnôu, châ tơxâng ƀă vâi pú lâp plâi tơnêi môi tiah Pôa Hồ pâ nhuô̆m rơhêng vâ.