Kơxê hâi lơ 16/10, a rôh Hôp dêi Tỉnh ủy kong pơlê Dak Lak, Khu Tơkŭm cheăng Xiâm tơnêi têa hiăng tơbleăng pơkâ dêi Khu xiâm kal kí rah xo pôa Lương Nguyễn Minh Triết, Ngế cheăng Tung tíu xiâm Đảng, Kăn pơkuâ hnê ngăn cheăng Đảng Pơlê kong kân Đà Nẵng pro Kăn pơkuâ hnê ngăn Tỉnh ủy Dak Lak hneăng 2025 – 2030 sap hâi lơ 15/10/2025.

Tơbleăng  xo hnoăng cheăng, pôa Lương Nguyễn Minh Triết - Kăn pơkuâ hnê ngăn Tỉnh ủy Dak Lak ki nếo tối hâk tơngăm drêng châ Tíu xiâm tơnêi têa loi khât pơcháu hnoăng cheăng pêi; tối kố tơmâng xo mâu tơdroăng hnê mơhno, tăng hlê trâu tâ ‘na veăng hôp ƀă hnoăng cheăng pêi ki kân tung tơdroăng rơtế tơkŭm ƀă Khu kăn Đảng ƀô̆ kong pơlê, Kăn hnê ngăn, hnê mơhno pêi klêi tơdroăng mơnhông cheăng kâ - pơlê pơla, tơniăn cheăng lêng tơkăng kong -  kring tơniăn, ai tiô tơdroăng púi vâ dêi môi kong pơlê a tơdế Tây Nguyên.

Pôa Lương Nguyễn Minh Triết kot mâ hơnăm 1976, pơlê xiâm cheăm Duy An, tơring Duy Xuyên, kong pơlê Quảng Nam (ton nah) nôkố cho dêi Pơlê kong kân Đà Nẵng; hriâm troh thak sih Quản trị Kinh doanh, Kih sư Công nghệ Silicat; Cao cấp Lý luận chính trị.