A rôh hôp tơpui, pôa Nguyễn Hòa Bình Phŏ - Ngế pro xiâm hnê ngăn Chin phuh khĕn kơdeăn mâu hnoăng veăng ‘no pêi ai pơxúa ƀă kal khât dêi pôa Lý Hiển Long - Ngế xiâm hnê ngăn ƀă tơdroăng mơdêk ƀă pro trâu rơdâ tơrŭm cheăng péa tơnêi têa xuân môi tiah mơnhông cheăng kâ dêi Việt Nam mâu hơnăm hdrối mê hía nah, tung mê, ai mơnhông rơdêi  ‘na cheăng ƀă kơmăi kơmok Việt Nam - Singapore (VSIP).

Pôa Nguyễn Hòa Bình - Phŏ ngế pro xiâm hnê ngăn Chin phuh púi vâ Ngế xiâm hnê ngăn kong têa Singapore pơtối tơmâng khât, veăng môi tuăn kum mơdêk tơrŭm cheăng péa tơnêi têa mơnhông rơdêi, ki khât, ai pơxúa tâ nếo xuân môi tiah kơjo kum hnê tối, túa pêi cheăng ‘na mơnhông mơdêk tíu xiâm liăn ngân ƀă mơdêk tơrŭm cheăng, tơdjêp pơla Tíu xiâm liăn ngân lâp plâi tơnêi dêi péa tơnêi têa.