Sap hơnăm 2017 troh nôkố, rêm hơnăm Hngêi kơmăi Alumin Nhân Cơ  hiăng pro 650.000 tâ̆n rơƀu meăm, veăng ‘no hnoăng pro dâng 500 rơtal liăn ‘mot a liăn ngân kong pơlê ƀă gum ăm 1 rơpâu ngế ai cheăng pêi. Tiô tối hdrối, pơla hơnăm 2025-2029, kô mơdêk kơxô̆ ki mê tâk 1,2 rơtuh tâ̆n/hơnăm, hlối ‘no liăn pro hngêi kơmăi pro meăm nhôm ƀă ivá pro 500 rơtuh tâ̆n.

Phŏ Ngế pro xiâm hnê ngăn tơnêi têa mơnê mâu hnoăng hiăng pêi pro dêi Grup pơkuâ cheăng hiăng pêi châ tơdoăng pêi pro tê mơdró; hlối pơkâ Grup tơrŭm krá ƀă Vi ƀan kong pơlê Dak Nông malối tung tơleăng mơnhên mâu tơdroăng ‘na tơnêi dêi kuăn pơlê tung tơdroăng tơkêa bro. Phŏ Ngế pro xiâm hnê ngăn tơnêi tối nhên ki kal dêi tơdroăng mơdêk pro rế trâu tung kơvâ pro meăm nhôm, tiô pơkâ dêi Grup mơdêk ‘no liăn cheăng, mơnhông tơƀrê ki pơxúa dêi nhôm, ing mê, veăng ‘no hnoăng mơnhông krá tơniăn dêi kơvâ cheăng ‘na kơmăi kơmok kố.