Pôa Nguyễn Hòa Bình, Phŏ ngế pro xiâm hnê ngăn tơnêi têa hiăng lăm séa ngăn kơpong tối vâ ‘no liăn ‘mâi rơnêu bro, rơnêu tơƀai a  tơraih tơƀai lâp plâi tơnêi Vân Đồn (tơring Vân Đồn, kong pơlê Quảng Ninh). Phŏ ngế pro xiâm hnê ngăn tơnêi têa pơkâ thế mâu Khu xiâm kơvâ cheăng, Vi ƀan kuăn pơlê kong pơlê Quảng Ninh tơrŭm krá ƀă khu ‘no liăn mơjiâng pro vâ tơniăn mơjiâng pro mâu tơdroăng tơkêa bro, ing mê, tơ’mot mâu khu ‘no liăn mơjiâng pro ing kong têa ê veăng a tơdroăng ‘mâi rơnêu, rak ngăn  troăng tơƀai kơneăng a Tơraih tơƀai Lâp plâi tơnêi Vân Đồn.

Pơtối mê, khu ki lăm pêi cheăng hiăng lăm ngăn mâu tơdroăng tơkêa bro ki ê a tung pơlê, mê cho tơdroăng tơkêa bro ‘no liăn mơjiâng tơmeăm khoăng kơpong tơtro ôm hyô, pơtê, ối (tá tê mơdró casino, tơnêi tơníu hngêi trăng, mơdró hngêi ăm tơmối kâ koi ối pơtê, hngêi pơtê ki lĕm kân resort ƀă hên ki ê) a cheăm Vạn Yên, tơring Vân Đồn xua grup Sun Group pro xiâm ‘no liăn pro.

Klêi tâng tơbleăng tơdroăng ki pá, tơvâ tơvân xuân môi tiah pâ thế ing peăng khu mơjiâng pro rơtế ƀă Vi ƀan kuăn pơlê kong pơlê Quảng  Ninh. Pôa Nguyễn Hòa Bình, Phŏ ngế pro xiâm hnê ngăn tơnêi têa pơcháu ăm mâu khu xiâm, kơvâ cheăng tơkŭm ngăn nếo, klêi mê tối tơbleăng, tối ăm Chin phuh rĕng pơkâ troăng vâ tah ki xơpá tung la ngiâ.