Hâi lơ 12/10, a Đà Lạt, Hneăng hôp mơhnhôk mơ’no liăn cheăng kong pơlê Lâm Đồng hơnăm 2025 păng ‘nâng pơxiâm po ƀă tơdroăng ki veăng dêi pôa Nguyễn Hòa Bình, Phŏ Ngế pro xiâm hnê mơhno má môi Chin phuh, pơkuâ mâu khu xiâm, kơvâ cheăng ƀă vâ chê 750 kăn teăng mâ, khu mơ’no liăn cheăng tung tơnêi têa, kong têa ê.

Pôa Nguyễn Hòa Bình, Phŏ Ngế pro xiâm hnê ngăn tơnêi têa kheăn kơdeăn tơdroăng mơ-eăm dêi Lâm Đồng – kơpong tơnêi tơkŭm ki pơxúa dêi kơpong kân rơdâ, kong ƀă têa kơxĭ, tơbleăng 132 tơdroăng tơkêa bro kơbông krếo khu mơ’no liăn cheăng hơnăm 2025 ƀă 358 tơdroăng tơkêa bro hneăng hơnăm 2026 – 2030.

Chin phuh tơkêa rơtế ƀă kong pơlê Lâm Đồng tơbleăng ăm pêi pro 4 khu troăng pêi ki kân: kêi đeăng troăng pơkâ pêi, pro tơniăn lĕm tíu mơ’no liăn cheăng; kơjo mơngế pêi cheăng ăm hngêi trăng troăng klông troăng pêi cheăng ton xŏn; xúa troăng pêi, troăng hơlâ ki phá tơ-ê vâ mơnhông krá tơniăn; mơdêk pơhlêh nếo tơmiât pêi rơkê, pơhlêh xúa kŏng ngê̆, mơnhông cheăng kâ krúa lĕm.

Phŏ Ngế pro xiâm hnê ngăn tơnêi têa xuân pơkâ thế kong pơlê tơkŭm tah lôi pá puât, ki má lối cho tăng tơnêi, rak tơniăn tŭm liăn mơno cheăng vâ mơdêk tơdroăng mơjiâng pro mâu tơdroăng tơkêa bro.