Kố cho rôh hôp apoăng ƀă xuân cho hneăng hôp kal dêi Lâm Đồng, châ tơdjêp ‘no tơdrêng ing troăng hyôh internet troh 123 to tíu pêi cheăng cheăm, bêng, kơpong tung kong pơlê. Đảng ƀô̆ cheăm Đơn Dương châ mơjiâng tung tơdroăng ki tơkŭm đảng ƀô̆ mâu cheăm Dă Ròn, Tu Tra ƀă pơlê jân Thạnh Mỹ, ƀă tâi tâng kơxô̆ vâ chê 1.200 ngế đảng viên.

Hneăng hôp hiăng tơpui ƀă pơkâ troăng tơmiât pêi, tơdroăng kal, troăng hơlâ ki xiâm pơla hneăng pêi cheăng la ngiâ, khŏm mơeăm mơjiâng cheăm Đơn Dương mơnhông tŭm têk, krá tơniăn. Ki xiâm cho ăm tơdroăng pêi lo liăn rêm ngế troh mơ’nui hneăng châ vâ chê 100 rơtuh liăn tung môi hơnăm; rơpŏng kơtiê ối pá xôp 0,2%. Tơpui a hneăng hôp, pôa Nguyễn Hòa Bình, Phŏ Ngế pro xiâm hnê ngăn tơnêi têa tối rơdêi, troăng hơlâ tâ phĭu tah lôi râ tơring, ‘mot tơkŭm râ cheăm tối tơdjuôm cho tơdroăng pơkâ kân, ai tơmiât troh la ngiâ dêi Tơnêi têa.

Đơn Dương dế ối a môi tơdroăng pơxiâm mơnhông nếo, môi rôh ki nếo. Phŏ Ngế pro xiâm hnê ngăn tơnêi têa loi, Đảng ƀô̆, kăn pơkuâ ƀă Kuăn pơlê mâu hdroâng kuăn ceăm Đơn Dương kô pêi pro ƀlêi chiâng Pơkâ Hneăng hôp, mơjiâng Đơn Dương chiâng môi tíu bâ thôn pơlê nếo tiô túa pơkâ a kong pơlê Lâm Đồng.