VOV4.Xơ Đăng - Kơxê lơ 21/3 a tíu pêi cheăng xiâm Đảng, pôa Nguyễn Phú Trọng, kăn xiâm hnê ngăn Đảng hiăng koh tơdah pôa Dato’ Sri Ismail Sabri bin Yaakob, ngế pro xiâm hnê ngăn kong têa Malaysia, troh koh tung rôh lăm pôu a Việt Nam. Ngế pro xiâm hnê ngăn kong têa Malaysia tối tơbleăng ƀă Kăn xiâm pơkuâ hnê ngăn Đảng ‘na tơdroăng hôp tơpui tơno ƀă pôa Phạm Minh Chính, Ngế pro xiâm hnê ngăn tơnêi têa, tối nhên Malaysia ngăn nhoăm tơdroăng tơrŭm cheăng ƀă Việt Nam, púi vâ péa pâ mơdêk tơrŭm pơla péa pâ tung mâu tơdroăng cheăng kâ, tê mơdró, ‘no liăn cheăng ƀă trâm tơpui tơno ƀă kuăn pơlê, tối vâ tơrŭm ôm hyô ƀă tơrŭm cheăng a têa kơxĭ ƀă Việt Nam vâ tí tăng ki ai hlâu ‘na tơmeăm khoăng vâ mơnhông tơ-ƀrê dêi péa tơnêi têa.

Pôa Nguyễn Phú Trọng xuân hiăng tơpui ƀă Ngế pro xiâm hnê ngăn kong têa Malaysia ‘na tơdroăng mơnhông cheăng kâ rêh ối Việt Nam, tối luât pơkâ ki tro dêi Việt Nam nhoăm ƀă púi vâ mơdêk tơrŭm cheăng ƀă Malaysia, pâ thế péa pâ pơtối rak ki tơ-ƀrê châ mơdêk tơ-ƀrê mâu luât pơkâ tơrŭm cheăng, tung mê ai mơdêk tơrŭm pơla mâu khu râ đảng, mơdêk tơrŭm pơla péa pâ xuân môi tiah tung ASEAN ƀă mâu tơdroăng tơrŭm cheăng tung kơpong ƀă lâp plâi tơnêi.

Gương tơplôu ƀă tơbleăng