VOV4.Xơ Đăng - Kơxê lơ 10/3, a tíu pêi cheăng xiâm Đảng, ing pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng, mâu kăn pơkuâ xiâm ƀă Khu hnê mơhno má môi Khu pơkuâ hnê ngăn cheăng Đảng hiăng hôp, mơnhên mâu tơdroăng ki má môi dêi Tơnêi têa, tơdroăng lâp plâi tơnêi tung 2 khế apoăng hơnăm 2022 ƀă hnoăng cheăng xiâm tung la ngiâ. Mâu kăn pơkuâ xiâm mơnhên, tung la ngiâ tơnêi têa pin kô pơtối trâm ƀă hên tơdroăng pá puât, pơloăng mơnúa nếo ki nếo ai, ki má lối cho tơdroăng tơplâ tơplong a Ukraina; pá puât xua liăn chu rơpâ yă, yă tơmeăm khoăng, yă têa châu têa kơxăng tâk; tơdroăng pơreăng xông tâ tú ó.

Mơgêi roh hôp, pôa Nguyễn Phú Trọng pơkâ thế, mâu râ, mâu kơvâ cheăng pơtối tơrŭm tơtro ƀă dêi pó, hnê mơhno pêi pro mâu hnoăng châ tơƀrê. Pơtối mê, tơkŭm pêi pro tơdâng tơ’mô mâu troăng hbrâ, mơdât pơreăng COVID-19; pêi pro mâu hnoăng cheăng, troăng pêi dêi Tơdroăng rak tơniăn ƀă mơnhông mơdêk cheăng kâ – rêh ối pơlê pơla; Tiô séa ngăn tơdroăng lâp plâi tơnêi, tơniăn gak kring ƀă tơniăn má môi ‘na châ mơngế, tơmeăm khoăng, pơxúa tiô luât, tơxâng ăm kuăn pơlê; Pơtối hnê mơhno tro tơdroăng, kơtăng tung tơdroăng hbrâ, mơdât kâ kơhveăm liăn ngân, tơdroăng ki ôh tá lĕm tro ƀă hía hé.

A Sa Ly tơplôu ƀă tơbleăng