VOV4.Xơ Đăng - Kơxo lơ 20/1, a Tíu pêi cheăng xiâm Đảng, Khu xiâm hnê mơhno hbrâ mơdât kâ kơhveăm liăn ngân, tơdroăng ki ôh tá tro roh hôp má 21 ing pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng, vâ hvái ngăn rêm tơdroăng cheăng, mơnhên mâu tơdroăng châ tơƀrê pêi cheăng hơnăm 2021 ƀă tơpui tối ‘na Tơdroăng pêi cheăng hơnăm 2022 dêi Khu hnê mơhno. Tung hơnăm 2021, mơhé ai pơreăng COVID-19 xông tâ tú ó; Tơdroăng pêi cheăng dêi Khu hnê mơhno hiăng châ pêi pro kơtăng ƀă kêi đeăng tiô pơkâ.

Ki rơhêng vâ tối, tung hơnăm nah, lâp tơnêi têa hiăng săm tối, séa ngăn 390 roh tơdroăng pro xôi/1.011 ngế xôi ‘na kâ kơhveăm liăn ngân, pôu râng hnoăng cheăng.  Tối ‘na hnoăng cheăng tung la ngiâ, pôa Nguyễn Phú Trọng, Kăn xiâm pơkuâ hnê ngăn Đảng pơkâ thế, mâu khu râ kăn pơkuâ hnê ngăn cheăng Đảng, khu pêi cheăng Đảng, kơ koan cheăng ôh tá chiâng tơngôu, tiô tuăn vâ, môi tuăn ƀă mâu tơdroăng châ tơƀrê; thế khŏm mơ-eăm, thăm pêi pro rơdêi tâ nếo tơdroăng tơplâ mơdât kâ kơhveăm liăn ngân, tơdroăng ki ôh tá lĕm tro; thăm séa ngăn, ti tăng plĕng. A roh hôp, Khu hnê mơhno hiăng tơpui tơno, tơpui tối vâ pêi kêi đeăng tơdroăng tơkêa bro Tơdroăng pêi cheăng hơnăm 2022 dêi Khu hnê mơhno.

A Sa Ly tơplôu ƀă tơbleăng