VOV4.Xơ Đăng - Hâi lơ 25 khế 1 hơnăm 2022, cho hâi lơ 23 khế 1 âm lĭch hơnăm Tân Sửu, pôa Nguyễn Phú Trọng, Kăn xiâm pơkuâ hnê ngăn Đảng ƀă pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ hiăng ăm dêi pó kơthô rơkâu hơnăm nếo klăng kuăn pơlê péa tơnêi têa Việt Nam ƀă kong têa Sinuâ hbrâ rơnáu tơdah Têt Lo hơnăm nếo Nhâm Dần.

Pôa Nguyễn Phú Trọng, Kăn xiâm pơkuâ hnê ngăn Đảng prế pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơtroh kơthô rơkâu hơnăm nếo Nhâm Dần 2022

Tơmiât troh hơnăm 2022, péa Kăn xiâm pơkuâ hnê ngăn Đảng pơkâ thế mâu khu xiâm, kơvâ cheăng ƀă kong pơlê péa tơnêi têa pêi pro kơtăng  tơdroăng hlê plĕng tơdjuôm khu râ kăn xiâm, thăm tơrŭm cheăng păng ‘nâng ‘na cheăng kâ – tê mơdró ƀă mơ’no liăn cheăng, thăm trâm mâ kuăn pơlê ƀă hên troăng pêi, tơrŭm cheăng krá tơniăn tung hbrâ mơdât pơreăng, mơdât ƀă tơleăng tơtro tơdroăng ôh tá môi tuăn tiô troăng tơpui tơno hơniâp lĕm, tơtro ƀă luât lâp plâi tơnêi, kum djâ tơrŭm cheăng pơla péa tơnêi têa, khu tơrŭm cheăng ton xŏn Việt Nam – Sinuâ mơnhông mơdêk ó rơdêi, krá tơniăn.

Khu tơrŭm cheăng ton xŏn tŭm têk Việt Nam – Sinuâ mơnhông mơdêk tơtro ó rơdêi, krá tơniăn, tơxâng tiô tơdroăng pơxúa, ton xŏn dêi péa Đảng, péa tơnêi têa ƀă kuăn pơlê péa tơnêi têa, xua hơniâp lĕm, tơniăn, tơrŭm cheăng ƀă mơnhông mơdêk châ tơƀrê dêi kơpong ƀă lâp plâi tơnêi. péa Kăn xiâm pơkuâ hnê ngăn Đảng, Tơnêi têa ƀă kuăn pơlê péa tơnêi têa Việt Nam – Sinuâ tơdah Têt Nhâm Dần tơniăn lĕm, hơniâp ro ƀă châ tơƀrê.

A Sa Ly tơplôu ƀă tơbleăng