VOV4.Xơ Đăng - Kơxê lơ 31/3, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng tơpui phôn ƀă khu râ kăn xiâm ƀă pôa Olaf Schoz, Ngế pro xiâm hnê ngăn kong têa Alơmăng, Kăn pơkuâ Đảng Dân chuh xah hô̆i Alơmăng. A roh tơpui phôn, pôa Olaf Schoz rơkâu mâu tơdroăng châ tơƀrê dêi Việt Nam tung mơnhông mơdêk tơnêi têa, mơdêk hnoăng cheăng lâp plâi tơnêi ƀă mơnhên tơdroăng ki nhuô̆m dêi kong têa Alơmăng ƀă tơdroăng tơrŭm cheăng ton xŏn Alơmăng – Việt Nam dế mơnhông mơdêk le\m, ai hên tơmeăm vâ mơnhông mơdêk ó rơdêi.

Tâi tâng a roh hôp tơpui tơno

Péa Kăn xiâm pơkuâ môi tuăn kô hnê mơhno tơdroăng tơrŭm cheăng tung mâu kơvâ cheăng péa tơnêi têa rơtế tơmâng tung la ngiâ. ‘Na têa kơxĭ Biển Đông, péa tơnêi têa môi tuăn ‘na tơdroăng ki kal dêi tơdroăng rak hơniâp lĕm, tơniăn, tơrŭm, mơnhông mơdêk ƀă nhuô̆m luât lâp plâi tơnêi, tung mê ai tơkêa hơnăm 1982 dêi Khu lâp kong têa 'na Luât têa kơxĭ.

‘Na tơdroăng kố, pôa Nguyễn Phú Trọng mơnhên troăng hơlâ môi tuăn dêi Việt Nam cho nhuô̆m mâu pơkâ dêi Khu lâp kong têa, pói vâ rêm pâ ki tơdjâk thăm tơpui tơno vâ pơtê tơplâ, vêh mơjiâng hơniâp lĕm ƀă nhuô̆m tơdroăng ki pơxúa tơxâng dêi rêm pâ, tơtro ƀă luât lâp plâi tơnêi.

A Sa Ly tơplôu ƀă tơbleăng