A rôh pêi cheăng, péa pâ hiăng tơpui ‘na tơdroăng mơnhông tơrŭm cheăng tung tâi tâng pơla Việt Nam ƀă Rusi tung pơla troăng hlâ tơpui kâ, pơkuâ dêi Việt Nam; tơpui ‘na mâu tơdroăng tơrŭm cheăng ki kal ƀă tơmeăm khoăng ai hlâu tung la ngiâ. Mâu kăn xuân tơpui tơno 'na tơmeăm ki ai hlâu tơdjêp ki rơdêi dêi Rusi tung mâu kơvâ cheăng kŏng ngê̆ rơxông nếo; tơpui tơno 'na mâu troăng hơlâ ki lâi 'na hnê mơjiâng mơngế pêi cheăng ƀă hriăn plĕng tơdjuôm vâ tơniăn tơdroăng tơrŭm cheăng kố mơnhông mơdêk krá tơniăn ƀă châ tơƀrê tung ton hơnăm.

Pôa Nguyễn Thanh Nghị pói vâ mâu kăn dêi Khu kăn, kăn pơkuâ kong têa Rusi a hnoăng cheăng dêi tơná kô chiâng kông tơdjêp ăm tơrŭm cheăng péa tơnêi têa, kum tơrŭm cheăng tiô khôi vâi krâ nah Việt Nam - Rusi rế hía rế mơnhông tơniăn lĕm, krá tơniăn xua tơdroăng kro mơdrŏng ƀă hơniâp lĕm dêi tá péa tơnêi têa.