VOV4.Xơ Đăng - Tơmiât troh Leh tơbâ Hâi ƀok thái pơkeăng Việt Nam 27/2, kơxo lơ 21/2, pôa Nguyễn Trọng Nghĩa, Kăn xiâm pơkuâ tơdroăng hnê cheăng kal tơnêi têa troh lăm pôu, rơkâu mâu ƀok thái pơkeăng Hngêi pơkeăng Tơnêi têa khu lêng 108, Hngêi pơkeăng pơlât châi xôu Tơnêi têa ƀă lăm pôu yăo sư, tiê̆n sih Vũ Văn Đính ngế ki mơjiâng kơvâ Hồi sức cấp cứu Việt Nam. Mơnhên tơdroăng mơ-eăm pleăng hnoăng cheăng dêi ƀok thái pơkeăng hngêi pơkeăng Tơnêi têa khu lêng 108, Hngêi pơkeăng pơlât châi xôu Tơnêi têa xuân môi tiah kơvâ khăm pơlât lâp tơnêi têa hiăng ƀă dế cho khu ki hbrâ mơdât pơreăng.

Pôa Nguyễn Trọng Nghĩa tối rơdêi, kố cho tơdroăng ki pleăng kân kĭn ăm hdroâng mơngế. Hên thái pơkeăng, ƀok thái pơkeăng pleăng dêi châ chăn tung tơdroăng hbrâ mơdât pơreăng ki ôh tá hlo mơhno a ngâ COVID-19. Pơtroh rơkong rơkâu troh mâu thái pơkeăng, ƀok thái pơkeăng klăng hâi Ƀok thái pơkeăng Việt Nam, pôa Nguyễn Trọng Nghĩa pơkâ tâi tâng kơvâ pơtối pêi pro tơtro pơkâ Tơnêi têa 6 hneăng má 12 ‘na pơtối pơ’lêh nếo tơdroăng tơkŭm po, pơkuâ, mơdêk ki hôm păng ‘nâng ƀă châ tơƀrê pêi cheăng dêi mâu hngêi pơkeăng tơnêi têa.

A Sa Ly tơplôu ƀă tơbleăng