Pôa Nguyễn Trọng Nghiã, Ngế pơkuâ hnê cheăng kal kí ƀă Hnê mơhnhôk xiâm tơnêi têa, tối nhên hnoăng cheăng ki kal dêi hngêi pơkeăng tung rak ngăn ivá kuăn pơlê, malối cho khu kăn ƀô̆ râ ki kân. Pôa Pơkâ thế kăn hnê ngăn Hngêi pơkeăng tơmâng mơjiâng khu ngăn pơkeăng, ƀok thái pơkeăng ki ai tuăn chân tơdroăng kal kí hlối khên tơnôu, rơkê cheăng khăm pơlât, hlối ƀĕng ƀeăn djâ troăng ahdrối, pêi cheăng tro tiô tŭm tơdroăng pơkâ ‘na tơdroăng cheăng khăm pơlât, ai hiâm mơno lĕm khât.

Malối tung pơla tơnêi têa mot tung rơxông nếo - rơxông mơnhông tơná mơnhông pro kro mơdrŏng, tăng tơdroăng tơniăn hơniâp. Pakĭng mê pơkâ thế Hngêi pơkeăng pơtối hnê mâu troăng hơlâ, tơdroăng cheăng pêi mơnhông khăm pơlât, tơniăn ‘na khăm tơdroăng rêh ối pơlê pơla, mơdêk ki tơƀrê tung khăm pơlât, ngăn kuăn mơngế ki châi tamo cho xiâm. Rôh kố, pêi tiô hnoăng pơcháu dêi Kăn xiâm hnê ngăn Tơnêi têa, pôa Nguyễn Trọng Nghiã diâp inâi “Thái pơkeăng kơhnâ rơkê’’ ăm 12 ngế.