VOV4.Xơ Đăng - Drêng tơbâ 92 hơnăm Hâi mơjiâng Đảng ƀă hbrâ rơnáu tơdah Têt Lo hơnăm nếo Nhâm Dần 2022, tiô khôi hmâ dêi hdroâng kuăn ngo, pôa Nguyễn Xuân Phúc, kăn xiâm hnê ngăn tơnêi têa hiăng troh chôu nhang tơbâ mâu vâi pú cho mâu kăn pơkuâ Đảng ƀă Tơnêi têa ki hiăng hlâ. Kơxê lơ 25/1, pôa Nguyễn Xuân Phúc hiăng troh chôu nhăng tơbâ pôa Nguyễn Đức Cảnh klăng a rôh hbrâ tơbâ 114 hơnăm Hâi kot mâ pôa hơnăm (1908 – 2022) a Hngêi tơbâ pôa Nguyễn Đức Cảnh, pơlê kong kân Hải Phòng.

Pôa Nguyễn Xuân Phúc, kăn xiâm hnê ngăn tơnêi têa chôu nhang tơbâ kăn xiâm pơkuâ Đảng, Tơnêi têa ki hiăng hlâ

Xuân tung rôh kố, pôa Nguyễn Xuân Phúc hiăng troh chôu nhang kơ Đăi tươ̆ng Võ Nguyên Giáp – Ngế lêng kăch măng tơdrăng, hok tro rơkê ƀă achê dêi pôa Hồ Chí Minh; Kăn xiâm pơkuâ ngăn lêng ƀă cho ngế Đăi tươ̆ng ki apoăng dêi Khu lêng kuăn pơlê Việt Nam. Pôa Nguyễn Xuân Phúc hiăng troh chôu nhang kơ Đăi tươ̆ng Trần Đại Quang, Kăn xiâm hnê ngăn tơnêi têa, kăn hnê ngăn Hô̆i đong tơdroăng cheăng lêng ƀă gak kring, kăn pơkuâ khu hnê mơhno cheăng Hơ’lêh luât Tơnêi têa sap ing hơnăm 2016 troh 2018.

Katarina Nga tơplôu ƀă tơbleăng