VOV4.Xơ Đăng - Hlo tơdroăng hơkăng a Ukraina, tơdroăng kring vế kuăn pơlê Việt Nam a Ukraina hên mâu kăn Đảng, Tơnêi têa pin tơmâng ngăn khât. Kơxê lơ 6/3, a tíu pêi cheăng dêi Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa hiăng tơmâng tối tơbleăng dêi Khu xiâm tơpui kâ ƀă mâu kơ koan khu râ pơkuâ cheăng tối tơbleăng ‘na tơdroăng mê. Tiô tối tơbleăng ing Khu xiâm tơpui kâ, nôkố, a Ukraina ai 7 rơpâu ngế Việt Nam.

Hên kuăn pơlê mơngế Việt Nam rêh ối a kong têa ki mê xuân hiăng lo ing kơpong tơplâ lăm ối a tíu tơniăn môi tiah lăm mot ối tung kong têa achê  môi tiah kong têa Ba Lan, Hungary, Bulgary. Khu xiâm tơpui kâ hiăng pêi cheăng ƀă mâu kơ koan khu râ pơkuâ cheăng tá Rusi ƀă Ukraina, khu lâp kong têa ƀă mâu kong têa ki ai kuăn pơlê Việt Nam lăm rêh ối vâ rak tơniăn  ‘na tơdroăng lăm ối xuân môi tiah drêng troh a kong têa ki mê ah kô châ tŏng kum teăm tơdrêng tíu ối kế kâ.

A rôh pêi cheăng, Kăn xiâm hnê ngăn tơnêi têa tối nhên, thế pêi tro má môi tơdroăng kring vế kuăn pơlê, oh tá chiâng lôi kuăn pơlê Việt Nam tro hlâ, tro rong a Ukraina. Kăn xiâm hnê ngăn tơnêi têa hâk mơnê Chin phuh ai pơkâ tơkŭm ăm mâu tơ-ƀai kơneăng chơ tê kơtê mâu ngế ki xơpá ƀă ai púi vâ vêh dêi a tơnêi têa; hlối pơkâ thế tung pơla mê, kal thế pêi pro tro tiô pơkâ, kum hdrối cho vâi kơdrâi, vâi ‘nĕng ƀă mâu hiăng krâ.

Gương tơplôu ƀă tơbleăng