VOV4.Xơ Đăng - Drêng troh leh tơdah Lo hơnăm nếo Nhâm Dần, pôa Nguyễn Xuân Phúc, Ngế pro xiâm hnê ngăn tơnêi têa teăng mâ kăn xiâm Đảng, tơnêi têa hiăng lăm pôu, hbru tơmeăm mơhnhôk hơlêm mâu ngế cheăng khăm pơlât, ƀok thái pơkeăng a mâu hngêi pơkeăng tung lâp pơlê kong kân Đà Nẵng cho hngêi pơkeăng Đà Nẵng ƀă hngêi pơkeăng C Đà Nẵng cho mâu hngêi pơkeăng pê klêi tơniăn tơdroăng khăm pơlât ăm kuăn pơlê dêi pơlê kong kân Đà Nẵng ƀă hên kong pơlê ing Nghệ An troh a mâu kong pơlê kơpong Tây Nguyên, ƀă xuân cho mâu hngêi pơkeăng pêi tro hnoăng cheăng tơdah xo mơngế mot pơlât xua tâ COVID-19.

Khĕn kơdeăn, mâu hnoăng cheăng dêi Hngêi pơkeăng hiăng pêi pro, pôa Nguyễn Xuân Phúc ăm ‘nâi, ôh tá châ 20 hâi xếo kô troh Têt Lo hơnăm nếo, Kăn xiâm hnê ngăn tơnêi têa púi vâ mâu ƀok thái pơkeăng kô pơtối rak vế pêi hnoăng cheăng ki tơná hiăng pêi tơ-ƀrê, pơtối mơ-eăm mơjiâng Hngêi pơkeăng pơlê kong kân Đà Nẵng chiâng Hngêi pơkeăng y khoa ki rơkê tung pơlât, ai tiô mơngế vâ khăm pơlât, veăng rak vế ivá kuăn pơlê pin. Kăn xiâm hnê ngăn tơnêi têa pơtroh rơkong lăm pôu, kơ êng mâu kăn xiâm Đảng, tơnêi têa troh kơvâ cheăng dêi pơlê kong kân Đà Nẵng, malối mâu hngêi pơkeăng pơlât kuăn pơlê, malối mâu hngêi pơkeăng ai tơdjâk pơlât hbrâ mơdât COVID-19 kố nah.

Gương tơplôu ƀă tơbleăng