VOV4.Xơ Đăng - Kơmăng lơ 24/2, tiô chôu kong têa Singapore, tơƀai pơto pôa Nguyễn Xuân Phúc, Kăn xiâm hnê ngăn tơnêi têa ƀă kơdrâi pôa rơtế ƀă khu râ kăn xiâm Việt Nam hiăng troh tơraih tơƀai lâp plâi tơnêi Changi, pơxiâm roh lăm pôu pêi cheăng kăn xiâm Tơnêi têa kong têa Singapore. Tơdah Kăn xiâm hnê ngăn tơnêi têa pin ƀă kơdrâi pôa ƀă khu râ kăn tơnêi têa pin a tơraih tơƀai, peăng Singapore ai pôa Vivivan Balakrishanan, Ngế xiâm tơpui kâ, Kăn teăng mâ Singapore a Việt Nam cho Jaya Ratnam.

Pôa Nguyễn Xuân Phúc, Kăn xiâm hnê ngăn tơnêi têa pin

Peăng Việt Nam ai pôa Mai Phước Dũng, Kăn teăng mâ Việt Nam a kong têa Singapore, kăn ƀô̆ ƀă mâu ngế pêi cheăng Kơ koan teăng mâ Việt Nam a Singapore. Tiô tơdroăng, tung roh lăm pôu pêi cheăng, pôa Nguyễn Xuân Phúc kô ai mâu roh trâm mâ tơpui tơno ƀă jâ Halimah Yacob, Kăn xiâm pơkuâ kong têa Singapore, trâm mâ tơpui tơno ƀă pôa Lý Hiển Long, Ngế pro xiâm hnê ngăn kong têa Singapore, trâm mâ tơpui tơno ƀă Kăn xiâm hnê ngăn Kuô̆k hô̆i kong têa Singapore cho pôa Tan Chuan-Jin.

Mâu roh trâm mâ khu râ kăn xiâm kố vâ thăm tơrŭm cheăng péa tơnêi têa hiăng kĭ tơkêa, tơpui tơno mâu tơdroăng tơrŭm cheăng nếo, pro trâu hơngế tơrŭm cheăng ton xŏn Việt Nam – Singapore. Mâu khu xiâm, kơvâ cheăng, khu tê mơdró péa tơnêi têa xuân kô tơpui tơno mâu mơ-éa ki kal tơrŭm cheăng tung mâu kơvâ cheăng kâ, tê mơdró, cheăng lêng, ‘na tơdroăng kal ƀă rơ’jíu, um tơvi, khoa hok kŏng ngê̆ ƀă hía hé.

A Sa Ly tơplôu ƀă tơbleăng