VOV4.Xơ Đăng - Kơxo lơ  23/2,  a tíu pêi cheăng dêi Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa tơdah pôa John Kerry, Ngế kum pêi hnoăng cheăng dêi Mih ‘na hyôh kong prâi pơ’lêh. Khĕn kơdeăn khât pôa John Kerry ai mơ-eăm mơdêk tơrŭm cheăng pơla péa tơnêi têa tung hơnăm hdrối, tung mê ai hbrâ ví Hyôh kong prâi pơ’lêh, Kăn xiâm hnê ngăn tơnêi têa pơkâ thế, pôa John Kerry Ngế kum pêi hnoăng cheăng ăm kăn xiâm pơkuâ kong têa mơhnhôk chin phuh Mih pơtối mơ-eăm tŏng kum Việt Nam tung mâu tơdroăng ki kal.

Kăn xiâm hnê ngăn tơnêi têa xuân hâk vâ ƀă tơdroăng ki kal ing mâu hneăng lăm pôu Việt Nam dêi Kăn hnê ngăn kong têa Mih, ki tơ-ƀrê dêi hneăng lăm pôu dêi kăn xiâm phŏ pơkuâ kong têa Mih, cho jâ Kamala Harris, mơdêk tơrŭm cheăng tung tâi tâng mâu tơdroăng pơla péa tơnêi têa. Mơnê Kăn xiâm hnê ngăn tơnêi têa hiăng mơdoh chôu tơdah, pôa John Kerry tối tiah kố, tung pơla dế mơnhông mơdêk tơniăn lĕm, tơdroăng tơrŭm cheăng pơla Việt Nam - Mih rế trâu tâ, khât tâ ƀă hlối tơ-ƀrê.

Tơpui tơno ‘na tơdroăng têa kơxĭ rế tâk đik ƀă tơdjâk kân troh kơpong tơbăng kroăng Cửu Long ƀă mâu kơpong klong dêi Việt Nam, pôa John Kerry ăm ‘nâi, Mih kô veăng kum Việt Nam tung tơdroăng ‘na hyôh kong prâi pơ’lêh, pơ’lêh xuá on tơhrik krúa, malối on tơhrik ing mâ hâi. Pakĭng mê, Mih kô kum Việt Nam pêi pro tơdroăng pơ’lêh kơxô̆, mơnhông ‘na cheăng kâ, rêh ối.

Gương tơplôu ƀă tơbleăng