VOV4.Xơ Đăng - Tung rôh lăm pôu râ Tơnêi têa troh a Singapore, a hâi lơ 25/2, pôa Nguyễn Xuân Phúc, Kăn xiâm hnê ngăn Tơnêi têa tơdah kăn pơkuâ ai mâu Grup pơkuâ xiâm dêi Singapore tung mâu kơvâ cheăng on tơhrik, mơjiâng pro kơphô̆; tê ‘na mâu hngêi trăng tơnêi tíu, kơpong cheăng ƀă kơmăi kơmok ƀă hên ki ê. Tơdah kăn pơkuâ Grup Kappel, pôa Nguyễn Xuân Phúc mơnhên tối khât Grup pơkuâ kố hiăng ‘no liăn cheăng tơƀrê a Việt Nam tung plâ hdrối kố nah, pơkâ thế Grup pơkuâ kố ‘no liăn cheăng a Việt Nam tung mâu kơvâ cheăng ‘no liăn tung kơvâ on tơhrik ki ê vêh mơjiâng pro, on tơhrik krúa, hngêi trăng ƀă kơphô̆ rơkê.

Mâu tơdroăng tơkêa kố kal ai túa pơkâ kân; hơ’lêh nếo rơkê, ai tơdroăng ki tơdjâk khât a Việt Nam. Tơdah kăn pơkuâ mâu Grup pơkuâ xiâm dêi Singapore, kăn xiâm hnê ngăn Tơnêi têa tối nhên: Việt Nam mơhnhôk khu mơdró kâ Singapore ‘no liăn cheăng a mâu kơvâ hngêi trăng, on tơhrik, kơlmăi kơmok mơjiâng pro kế tơmeăm, pêi chiâk deăng, kong ngê̆ thong tin, kơphô̆ rơkê, ‘na liăn ngân, hngêi rak liăn.

Tối nhên, mơdêk ‘no liăn cheăng cho môi tơdroăng ki kơjo kum dêi Việt Nam tung la ngiâ, Kăn xiâm hnê ngăn tơnêi têa pơkâ thế Khu tơrŭm mơdró kâ Singapore ‘no liăn cheăng a Việt Nam, veăng kum mơdêk tơrŭm cheăng pơla péa pâ tâk troh a tơdroăng ki nếo.

Katarina Nga tơplôu ƀă tơbleăng