VOV4.Xơ Đăng - Tung roh lăm pôu râ kăn xiâm Tơnêi têa troh a kong têa Singapore, kơxê hâi lơ 25/2 a Hngêi Kuô̆k hô̆i kong têa Singapore, pôa Nguyễn Xuân Phúc, Kăn xiâm hnê ngăn tơnêi têa hiăng ai roh trâm mâ tơpui tơno ƀă pôa Tan Chuan-Jin, Kăn xiâm hnê ngăn Kuô̆k hô̆i. Pôa Tan Chuân-jin phiu ro roh lăm pôu pêi cheăng dêi pôa Nguyễn Xuân Phúc ƀă phiu ro drêng châ tơƀrê lĕm dêi mâu roh trâm mâ tơpui tơno pơla pôa Nguyễn Xuân Phúc ƀă jâ Halimal Yacop, Kăn xiâm pơkuâ kong têa Singapore ƀă pôa Lý Hiển Long, Ngế pro xiâm hnê ngăn kong têa Singapore, tơdrêng amê rơkâu Việt Nam ‘na mâu tơdroăng châ tơƀrê mơnhông mơdêk cheăng kâ – rêh ối pơlê pơla tung pơla kố nah ôh tá bê tơmâng tơdjâk dêi pơreăng kân COVID-19.

Pôa Nguyễn Xuân Phúc mơnhên Việt Nam đi đo nhuô̆m ƀă pói vâ thăm tơrŭm cheăng ton xŏn ƀă kong têa Singapore, pơkâ thế péa pâ thăm tối dêi pó túa ki rơkê tơtro tơbleăng troăng hơlâ luât teăm tơdrêng tŏng kum Chin phuh péa tơnêi têa tung tơdroăng hbrâ mơdât pơreăng, pơ’lêh tíu mơ’no liăn cheăng tê mơdró vâ kum rak tơniăn cheăng kâ – rêh ối pơlê pơla tung tơdroăng ‘’tiah hmâ nếo’’; pêi pro mâu tơdroăng tơrŭm cheăng tơxâng tơrŭm cheăng ton xŏn pơla péa tơnêi têa.

A Sa Ly tơplôu ƀă tơbleăng