VOV4.Xơ Đăng - Xuân tung kơxê hâi lơ 21/3/2022, a Tíu pêi cheăng kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa hiăng tơdah pôa Dato’ Sri Ismail Sabri bin Yaacob, Ngế pro xiâm hnê ngăn kong têa Malaysia drêng lăm pôu păng ‘nâng Việt Nam. Pôa Nguyễn Xuân Phúc mơnhên tối khât rôh lăm pôu kố ai pơxúa kal khât vâ pro ivá nếo ăm tơdroăng ki mơnhông tơrŭm cheăng ƀă kong têa tơrŭm cheăng tung la ngiâ pơla péa tơnêi têa. Kăn xiâm hnê ngăn tơnêi têa lối hâk mơnê khât ‘na môi tơnêi têa Malaysia hơniâp lĕm ƀă rơkê; rơkâu Malaysia rak vế ivá mơdêk GDP hơnăm2021 châ 3,1% ƀă pêi pro troh tơdroăng ki lôu péa tơdah tơmối kong têa ê sap ing hâi lơ 1/4/2022; loi tơngah tiah kố Chin phuh Malaysia kô pêi pro tơƀrê túa pơkâ 5 hơnăm rôh má 12, ăm Malaysia chiâng kong têa pêi lo liăn hên a hơnăm 2025 ƀă ai hnoăng cheăng, ivá cheăng kong têa ê rế hía rế hên.

Pôa  Nguyễn Xuân Phúc pơkâ thế péa tơnêi têa xúa mâu tơdroăng ki pơxúa dêi mâu tơkêa tê mơdró tơniăn krê xua péa tơnêi têa rơtế veăng, mơdêk tơrŭm cheăng mơjiâng tơdroăng cheăng kâ rơkê plĕng tung tơdroăng ki mâu kong têa cheăng kâ ASEAN vâ rơtế ‘mâi mơnhông ƀă mơdêk.

Katarina Nga tơplôu ƀă tơbleăng