A rôh tơdah ƀă pêi cheăng a Kăn teăng mâ Cuba a Việt Nam, pôa Rogelio Polanco Fuentes, Ngế pơkuâ Hok viê̆n kal kí tơnêi têa Hồ Chí Minh – pôa Nguyễn Xuân Thắng tối Hok viê̆n đi đo nhoăm ƀă púi vâ mơdêk tâ nếo tơrŭm cheăng ƀă khu tơrŭm Cuba, veăng ‘no hnoăng mơnhông tơrŭm môi tuăn tiô hmâ dêi péa tơnêi têa.

Péa pâ tơpui tơno ‘na mâu tơdroăng tơrŭm pơla Hngêi trung hnê Kal kí Tơnêi têa Hồ Chí Minh ƀă mâu khu tơrŭm cheăng Cuba tung mâu hơnăm hdrối; môi tiah mơdêk hnê hriâm, hnê tuăn ngôa rơkê hnê tơ’nôm ăm mâu kăn ƀô̆, malối mâu kăn pơkuâ, rak ngăn mâu hnoăng cheăng; tơrŭm tung tơdroăng tăng ‘nâi plĕng tơpui tơno ƀă mâu tơdroăng ki khât ki péa pâ rơtế vâ ’nâi plĕng; mơdêk hnê tối ‘na tơdroăng kring vế xiâm tuăn mơno dêi Đảng ƀă tơdroăng cheăng Hngêi trung hnê kal kí.