VOV4.Xơ Đăng - Kơxo lơ 17/3, a Tíu pêi cheăng Chin phuh, pôa Phạm Bình Minh, Kăn cheăng tung Khu xiâm kal kí, Ngế pro xiâm phŏ hnê mơhno má môi pơkuâ roh hôp mơ’no tơdrêng tung um tiô troăng măng Internet vâ tơmâng mâu Khu xiâm, kơ koan tơbleăng ‘na tơdroăng pêi pro mâu Tơdroăng pơkâ xiâm Tơnêi têa hneăng hơnăm 2021 – 2025 hiăng châ Ngế pro xiâm hnê ngăn Chin phuh kĭ ăm pêi pro cho Tơdroăng pơkâ xiâm tơnêi têa mơnhông mơdêk cheăng kâ - rêh ối pơlê pơla  kơpong vâi krâ hdroâng kuăn ngo ƀă kong ngo; Tơdroăng pơkâ xiâm tơnêi têa kơdroh kơtiê krá tơniăn ƀă Tơdroăng pơkâ xiâm tơnêi têa mơjiâng thôn pơlê nếo.

Pôa Phạm Bình Minh, Ngế pro  xiâm phŏ hnê ngăn tơnêi têa xông tơpui mơgêi roh hôp

Mơgêi hneăng hôp, pôa Phạm Bình Minh, Ngế pro  xiâm phŏ hnê ngăn tơnêi têa pơkâ thế, Vi ƀan hdroâng kuăn ngo, Khu xiâm pơkuâ cheăng pêi  - Mô đô̆i rong ƀă pơlê pơla ƀă Khu xiâm pơkuâ ‘na pêi chiâk deăng ƀă mơnhông mơdêk thôn pơlê thâ kêi đeăng mâu pơkâ, troăng pơkâ pêi tung khế 3 vâ tơbleăng Vi ƀan pơkuâ Kuô̆k hô̆i ‘na xing xoăng liăn ngân ăm mâu tơdroăng pơkâ xiâm tơnêi têa. Ngế pro xiâm phŏ hnê ngăn tơnêi têa tối nhên, tơdroăng rĕng hbrâ tŭm ‘na luât cho kal khât vâ pêi pro châ tơƀrê mâu tơdroăng pơkâ xiâm tơnêi têa tung la ngiâ.

A Sa Ly tơplôu ƀă tơbleăng