VOV4.Xơ Đăng - Tung roh lăm pôu ƀă pêi cheăng a Việt Nam, kơxê lơ 23/2, a Tíu pêi cheăng Chin phuh, pôa Phạm Bình Minh, Ngế pro xiâm phŏ hnê ngăn má môi Chin phuh hiăng tơdah Kăn teăng mâ dêi Kăn xiâm pơkuâ kong têa Mihcho pôa John Kerry. A roh tơdah, pôa Phạm Bình Minh tối phiu ro drêng mâu tơdroăng mơnhông mơdêk nếo tung tơrŭm cheăng Khu tơrŭm cheăng tŭm têk Việt Nam – Mih tung rêm kơvâ cheăng, tung mê kơxô̆ liăn pêi lo tê mơdró péa tơnêi têa hơnăm 2021 châ 111 rơtal dollars.

Ngế pro xiâm phŏ hnê ngăn tơnêi têa kheăn kơdeăn ƀă mơnê mâu tơdroăng mơ-eăm ƀă veăng tŏng kum dêi pôa John Kerry tung tơdroăng rak tơniăn tiah hmâ ƀă thăm tơrŭm cheăng Việt Nam – Mih to lâi chât hơnăm hiăng hluâ; ing tơdroăng xiâm kối ki ai nôkố, pơkâ thế péa tơnêi têa pơtối thăm tơrŭm vâ thăm mơnhông tơrŭm cheăng Việt Nam – Mih mơnhông mơdêk tơniăn, ton xŏn, păng ‘nâng ƀă châ tơƀrê.

Klăng roh kố, Ngế pro xiâm phŏ hnê ngăn tơnêi têa xuân mơnê Chin phuh Mih troh nôkố hiăng tŏng kum Việt Nam tâi tâng 29,1 rơtuh kong kếo vaccine hbrâ mơdât COVID-19; tối pói vâ Mih pơtối kơjo tŏng kum Việt Nam tung mâu kơvâ hnê hriâm – hnê mơjiâng tuăn ngôa rơkê, khăm pơlât, tŏng kum mơngế pá puât, tơdroăng cheăng kâ xúa kơmăi kơmok rơxông nếo ƀă hía hé.

A Sa Ly tơplôu ƀă tơbleăng