VOV4.Xơ Đăng - Kơxê lơ 20/1, pôa Phạm Bình Minh, Ngế pro xiâm phŏ hnê mơhno má môi Chin phuh, Kăn xiâm hnê ngăn Vi ƀan rak tơniăn troăng prôk ƀă rơxế kơtâu tơnêi têa hiăng troh lăm pôu ƀă pêi cheăng ƀă Kơ koan xiâm Kan sát rak tơniăn troăng klông, Khu xiâm pơkuâ kŏng an. Hơnăm hiăng hluâ, tung pơla ai hên tơdroăng pá puât, pơloăng mơnúa, laga khu Kan sát rak tơniăn troăng klông hiăng pêi kêi đeăng mâu pơkâ xiâm, pơkâ mơ’no. Tơdroăng tơklâm rơxế tung hơnăm hiăng hluâ kơdroh tŭm 3 tơdroăng ‘na kơxô̆ roh, kơxô̆ mơngế hlâ ƀă kơxô̆ ngế tro rong tâng pơchông ƀă hơnăm 2020.

Tung hơnăm khu Kan sat rak tơniăn troăng klông tơnêi têa hiăng pro mơ-éa, pơxâu phâk 2,9 rơtuh ngế pro xôi troăng klông, pơxâu phâk liăn vâ chê 3 rơpâu rơtal liăn. Xông tơpui a roh pêi cheăng, pôa Phạm Bình Minh pơchân tối tung roh Têt Lo hơnăm nếo la ngiâ, khu Kan sat rak tơniăn troăng klông kal xing xoăng mơngế thăm séa ngăn, pơxâu phâk mâu ngế pro xôi cho xiâm kối chiâng ai tơdroăng tơklâm rơxế.

A Sa Ly tơplôu ƀă tơbleăng